NU SIEUN KU KALANGKANG SORANGAN [Kénging Ahmad Fawzy Imron ]

Imah leutik. Euweuh jandéla. Pantona nulak sapanjang beurang. Manéhna ngahéphép bari teu eureun luak-lieuk, niténan tukang jeung hareupna. Melongkeun luhur jeung handapna. Rénghapna sakerep ci hujan nu ragragan. Kadang nyoara, sanajan ukur gerung teu puguh nu kedalna.Mun pasosoré datang, sok pirajeunan aya nu ngetrok kana panto imahna. "Sarpala...ieu kadaharan. Geura ampihan." Jempling deui.Sapanjang peuting. Lawang muka tulakna. Manéhna angger ngahéphép bari teu leupas mencrongkeun panon ka unggal nu asup ka jero imahna. Sapanjang peuting, puluhan wujud nu dibulen ku kaén hideung, maturan manéhna. Aya hangru nu seukeut kaangseuna. Sora-sora nu kaluar ukur gerung nu teu puguh kapirengna. Bangké-bangké hayam nu ti soré kénéh geus sadia, ukur nyésa tulangna.Peuting ampir lekasan. Nu maturan geus laleungitan. Panto ditulakan. Manéhna ngahéphép. Aya tapak getih dina bahamna. Napasna kerep pisan, siga ci hujan nu ragragan. [http://fikminsunda.com/arsip/petingan]

KA BAYAN ÉS BAJIGUR [Kénging Rohendi Pandeglang]

Panon poé mentrang. Ka Bayan dagang bajigur. Panas dilawan. Haténa galécok méménta kana sungapan langit, sing turun pitiriseun.

Kasorénakeun beuki ngahéab. Doang ngahajakeun. Nu pimeulieun areuweuh. Tukang sop buah, laris manis kanu harayang tiis.

Sareupna, angger teu béak héab. Teu éléh géléng, Ka Bayan meuli és batu. Gujubar bajigur nu haneut ditiisan. Diasaan sorangan, "tah... tah... ahéng yeuh, és bajigur, anu héés kadeuleu jubur...!" hahariringan, ngasuh kakeuheul. Bajigur tiis mairan, ngalokan "aweu...aweu...aweu, haras...haras..." Ramé. Nu mareuli sop buah nyalampeurkeun. Ngariung pagelaran és bajigur Ka Bayan. Lang-lung ngalungkeun récéh. Ka Bayan jeung és bajigur beuki maceuh. Lang-lung jadi rébuan, lima rébuan, puluh rébuan, lima puluh rébuan, ratus rébuan. Ayeuh-ayeuhan.

Ger hujan badag, ngagebrét. Pangalungan teu kapulungan, lapur kabawa palid cileungcang.

Barang raat, aya nu nyalampeurkeun Ka Bayan. "Dua gelas Ka?!" "Tilu dibungkus Ka?!" "Dua gelas di dieu, tujuh dibungkus Ka?!" Raong.

Balik lumayan, bajigur tiis géh payu, ngagerenyem. Tepi ka imah, ngagakgak... duit pangalungan pabalatak dina kolong imah. Cileungcangan.[http://fikminsunda.com/arsip/petingan]